مچھ کے مقام پر دہشت گردی میں ہزارہ برادری سے تعلق رکھنے والے افراد کے قتل کے خلاف کراچی میں مجلس وحدت المسلمین اور اہلِ تشیع برادری نے 28 مقامات پر دھرنے دیے ہوئے ہیں جن کی وجہ سے شہریوں کو اپنے کام کاج پر پہنچنے میں شدید دشواری کا سامنا ہے۔
گلی کوچوں سے موٹر سائیکلوں پر نکلنے والے شہریوں اور مظاہرین میں تلخ کلامی کے واقعات رونما ہو رہے ہیں، اسی نوعیت کے ایک واقعہ کے بعد شاہراہ فیصل پر ڈرگ روڈ کے قریب مشتعل افراد نے 5 موٹر سائیکلوں کو آگ لگا دی۔
پولیس کے مطابق بدنظمی کے اس واقعہ کے بعد شہری موٹر سائیکلیں چھوڑ کر بھاگ نکلے، اس دوران نامعلوم افراد نے 5 موٹر سائیکلوں کو آگ لگا دی جن میں سے بعض کو جزوی نقصان پہنچا ہے۔ واقعہ کی تفتیش کی جارہی ہے۔
