آئی سی سی ورلڈکپ میں سری لنکا کے خلاف ریکارڈ ساز فتح کے بعد سابق بھارتی کرکٹرز اور کمنٹیٹرز پاکستانی بیٹنگ لائن کی تعریف کرنے پر مجبور ہوگئے۔
گزشتہ روز سری لنکا کیخلاف میچ میں عبداللہ شفیق اور محمد رضوان نے سنیچریاں اسکور کیں اور ٹورنامنٹ میں مسلسل دوسری جیت درج کی۔
اس میچ میں آئی لینڈرز نے مقررہ 50 اوورز میں 9 وکٹوں کے نقصان پر 344 رنز بنائے، کوشال مینڈس 122 اور سمارا وکرما 108 رنز بناکر نمایاں رہے تھے جبکہ ہدف کے تعاقب میں قومی ٹیم نے 4 وکٹوں کےنقصان پر 49 ویں اوور میں 345 رنز کا پہاڑ جیسا ٹارگٹ حاصل کرلیا۔
عبداللہ شفیق نے صرف پانچویں ون ڈے میں کھیلتے ہوئے 113 رنز بنائے، جس میں 10 چوکے اور 3 چھکے شامل تھے جبکہ محمد رضوان نے 131 رنز کی ناقابلِ شکست اننگز کھیلی۔
دونوں بیٹرز نے ریکارڈ ہدف کیلئے 176 رنز کی پارٹنرشپ قائم کی اور پاکستان کو میچ جتوانے میں اہم کردار ادا کیا۔
پاکستان مخالف ٹوئٹ کیلئے مشہور عرفان پٹھان نے لکھا کہ کیپنگ کے 50 اوورز اور پھر دباؤ میں اسپین اٹیک کیخلاف شاندار سینچری! رضوان نے شاندار کھیل پیش کیا۔
معروف کمنٹیٹر ہرشا بھوگلے نے لکھا کہ 50 اوورز فارمیٹ کا بہترین رن چیز، جہاں اننگز بنائی جاتی ہیں وہاں عبداللہ شفیق کا کردار بہت اہم رہا۔
وریندر سہواگ نے لکھا کہ کیا پھینٹا لگایا ہے! ابتدائی 2 وکٹیں جلد گرنے کے بعد پاکستان نے شاندار انداز میں ہدف کا تعاقب کیا، عبداللہ کی بیٹنگ اور رضوان کا پراعتماد ہونا قابل تعریف ہے۔
