حلیم عادل شیخ 3 روزہ جسمانی ریمانڈ پر پولیس کے حوالے

انسداد دہشتگردی عدالت نے سندھ اسمبلی میں اپوزیشن لیڈر حلیم عادل شیخ کو 3 روزہ جسمانی ریمانڈ پر پولیس کے حوالے کردیا۔ پولیس نے حلیم عادل شیخ اور دیگر ملزمان کو بکتر بند گاڑی میں انسداد دہشت گردی کی عدالت میں پیش کیا، اس موقع پر سیکیورٹی کے سخت انتظامات تھے۔ عدالت میں دوران سماعت تفتیشی افسر نے حلیم عادل شیخ اور دیگر ملزمان کے جسمانی ریمانڈ کی استدعا کی جس کی حلیم عادل کے وکیل نے مخالفت کرتے ہوئے کہا کہ کیس نہیں بنتا لہٰذا ریمانڈ کی درخواست مسترد کی جائے تاہم عدالت نے پولیس کی استدعا منظور کرتے ہوئے اپوزیشن لیڈر حلیم عادل شیخ، غلام مصطفیٰ، عبدالحسیب، محمود اور رمضان کا 3 روز کا جسمانی ریمانڈ منظور کرلیا۔ عدالت نے پولیس کو حکم دیا کہ ملزمان کو جمعہ کے روز دوبارہ پیش کیا جائے۔