گورنمنٹ کالج ٹیکنالوجی برائے خواتین کریم آباد کراچی کی پرنسپل نے سندھ ٹیکنیکل ایجوکیشن اتھارٹی کے ریجنل ڈائریکٹر سید کمال مصطفیٰ قریشی پر ہراساں کرنے کا الزام لگایا ہے۔ ایم ڈی ایس ٹیوٹا کے مطابق ریجنل ڈائریکٹر نے خواتین کالج میں جا کر خاتون ٹیچر اور پرنسپل پر جنسی حملہ کیا، پرنسپل نے روتے ہوئے فون کیا اور سید کمال مصطفیٰ قریشی کے جنسی حملے کے بارے میں آگاہ کیا۔
ووکیشنل اتھارٹی کے مینجنگ ڈائریکٹر آغا سہیل نے واقعہ کی تحقیقات کے لئے چیف سیکرٹری کو مراسلہ لکھ دیا جس میں کہا گیا کہ ریجنل ڈائریکٹر سید کمال مصطفیٰ قریشی کو فوری طور پر معطل کر کے ان کے خلاف تحقیقات کی جائے جبکہ ریجنل ڈائریکٹر کا کہنا ہے کہ ایسا واقعہ نہیں ہوا ہے، ریجنل ڈائریکٹر کا عہدہ حاصل کرنے کے لئے خاتون افسر نے یہ گھٹیا حرکت کی ہے۔
