گلشن اقبال،ڈکیت 2 کروڑ روپے لے کر فرار

کراچی: گلشن اقبال بلاک 4 میں بنگلے سے ڈکیت مبینہ طور پر2 کروڑ روپے لوٹ کر فرار ہوگئے، پولیس کے مطابق ڈکیتی کا یہ واقعہ گلشن اقبال بلاک4میں پیش آیا، ملزمان بنگلے سے مبینہ طور پر دو کروڑ روپے لے کر فرار ہوگئے، پولیس نے ڈکیتوں کی گرفتاری کے لیے کارروائی کا آغاز کردیا۔ ڈکیتی کے وقت بنگلے میں تعمیراتی کام چل رہا تھا، مکین دوسرے گھر میں تھے، 3 مسلح ملزمان سفید کار میں ڈکیتی کے لیے بنگلے پر پہنچے، بنگلے میں صرف چوکیدار اور مزدور کام کررہے تھے۔ ڈکیتی کے حوالے سے پولیس نے یہ بھی بتایا کہ ملزمان کمرے میں لگے دروازے کا لاک توڑ کر داخل ہوئے۔ پولیس کا کہنا تھا کہ بنگلے میں داخل ہونے کے بعد مسلح ملزمان نے الماری میں رکھے 2 کروڑروپے لوٹے، ملزمان جاتے وقت ڈی وی آربھی ہمراہ لے گئے، چوکیدار کو حراست میں لے کر تھانے منتقل کردیا گیا۔ واقعے کا مقدمہ گلشن تھانے میں درج کرلیا گیا، تفتیش جاری ہے۔